Корисниците на Facebook кои ја користат десктоп верзијата веќе почнаа да добиваат редизајнирана верзија на социјалната платформа. Оние кои уште не добиле, тоа може да го очекуваат во наредните денови.
Речиси сите навигациски елементи, менија и поставки се преместени лево на десктоп верзијата на платформата, без навигација на врвот на страницата. Десно ќе има само копче за пораки на дното на екранот.
Како што пишуваат некои корисници, не биле прашани дали сакаат да го прифатат новиот редизајн, а очигледно засега нема начин да се вратите на претходната верзија, доколку веќе сте ја добиле.
Facebook во кратка порака понуди објаснување за новината.
„Ги преместивме сите ваши опции за навигација на едно место. Оваа промена комбинира сè што ви треба на Facebook - вашиот профил, пребарување, известувања, пораки и многу повеќе“, се вели во известувањето.
Поминаа речиси точно две години откако Facebook го лансираше својот најнов голем редизајн, кој вклучуваше голема промена во навигацијата на страницата, „почист“ изглед и опционален темен режим. Тоа беше голема промена и требаше време да се навикнеме, но тоа беше многу потребна ревизија на пренатрупаниот Facebook од старите времиња.
Оваа нова промена е малку дезориентирачка. Нема повеќе копче Home, бидејќи е заменето со логото на Facebook во горниот лев агол. Исто така, тешко е да се навикнеме на фактот дека нема апсолутно ништо во горниот десен агол, каде што порано беа некои од најважните функции и опции, вклучувајќи нотификации и Messenger.
Имањето на повеќето функции и опции лево е вообичаено во веб дизајнот; Twitter и Gmail имаат сличен изглед. Facebook, сепак, има огромно количество опции, функции, копчиња и кратенки, па ставањето на сето тоа лево можеби не е идеалното решение.