Египетскиот напаѓач Мохамед Салах преку социјалните мрежи емотивно се прости од својот пријател, а сега поранешен соиграч од Ливерпул, Сади Мане.
Сенегалецот синоќа и официјално се пресели во Баерн, па одличното напаѓачко дуо кое последните години бележеше големи успеси во Англија и Европа, се распадна.
„Тоа беше вистинско возење! Ти благодарам за сите убави моменти и ти посакувам сѐ најдобро во твојата нова авантура! На сите ќе ни недостасуваш“, напиша Салах на Instagram со серија заеднички фотографии со пријателот, а одговорот на Мане брзо пристигна.
„Продолжи да ги правиш твоите работи!! Брат, ти си најдобар“, одговори Мане, со што стекна и голема почит меѓу египетските навивачи.
Мане и Салах во првите три месеци од годинава имаа три меѓусебни пресметки со своите репрезентации, а поуспешен беше Сенегалецот. На Африканскиот куп на нации Сенегал со Мане на пенали го победи Египет на Салах и стана африкански шампион, а потоа кон крајот на март во баражот за пласмaн на Мундијалот во Катар пеналите повторно беа талични за Сенегалците што значи дека Салах ќе го гледа Мане на ТВ како игра на Мундијалот.
За потсетување, сега веќе поранешниот напаѓач на Ливерпул синоќа потпиша тригодишен договор со Баерн, а вредноста на трансферот е 40 милиони евра.
Мане помина шест години во Ливерпул (2016-2022) и го напушти клубот една година пред да му истече договорот. За „Црвените“ одигра 269 натпревари и постигна 120 голови.
Инаку, Мане е третото засилување на Баерн ова лето откако претходно од Ајакс пристигнаа Рајан Гравенберх и Нусаир Мазруаи.