Новото ограничување на брзината од 30 км/ч важи од 1 јануари на речиси целата територија на белгиската престолнина.
Градските власти велат дека со единствена мерка во сите 19 градски општини во Брисел ќе се помогне да се намали бројот на несреќи и да се зголеми безбедноста на патиштата.
Само неколку главни сообраќајници ќе бидат ослободени од новото ограничување, пренесува Euronews.
Мислењата на жителите во Брисел се поделени. Некои веруваат дека е подобро автомобилите да возат побавно, особено за безбедноста на децата.
Од друга страна, најмалку еден возач за белгискиот RTBF изјави дека, иако се согласува со ограничувањето на брзината околу училиштата, претерано е да се примени насекаде.
Сепак, првиот човек на бриселската општина Шарбек, која го применува ограничувањето од 2018 година, не се согласува.
„Сè уште има луѓе кои не сакаат да разберат колку е важна безбедноста на патиштата“, вели тој.
„Тоа ќе има ефект не само на намалување на бројот на сообраќајни несреќи – а сме немале тешки сообраќајки тука веќе две години - туку и на намалување на бучавата во градот.“
Полицијата веќе започна да следи дали се почитува новото ограничување во 19 градски општини и треба да се инсталираат десетици нови камери за контрола на брзината.
Повеќето прекршители ќе бидат казнети со парична казна, но официјалните лица велат дека оние што ќе бидат неколкупати фатени како возат со преголема брзина ќе се соочат со конфискација на автомобилот.
Неколку градови во Европа веќе одлучија да воведат единствено ограничување на брзината од 30 км/ч.
Пред неколку месеци, шпански Билбао стана првиот поголем град во светот (со над 300.000 жители) што воведе единствено ограничување на брзината од 30 км/ч во урбаните подрачја.
Во Париз, во тек се консултации со жителите за воведување на слично решение, а властите посочуваат дека „Зоната 30“ веќе опфаќа околу 60 проценти од територијата на градот.
Лани во октомври Претставничкиот дом на Холандија го усвои предлогот ограничувањето на брзината од 30 км/ч да стане норма во населени места, наместо дотогашните 50 км/ч.
Повеќето градови имаат општо ограничување на брзината од 50 км/ч. Намалувањето до 30 км/ч ја подобрува безбедноста, особено за ранливите учесници во сообраќајот.
Пешаците имаат дури 90 проценти шанси за преживување доколку ги удри автомобил што вози со брзина од 30 км/ч. Доколку автомобилот вози со брзина од 50 км/ч, шансите се намалуваат на 50%.
Ограничувањата на брзината придонесуваат за безбедност на многу начини. Ако возите со помала брзина, растојанието за запирање е помало, видното поле на возачот е пошироко и имаме повеќе време да реагираме во случај на опасност.
Ефикасноста на воведувањето на ограничувањето од 30 км/ч може да се види во примерот на Хелсинки. Поголемиот дел од центарот на градот во моментов е во зоната на брзина 30, а инфраструктурата влијае и на побавно возење, на пр. легнати полицајци, подигнати пешачки премини и кружни текови.
Резултат - минатата година во главниот град на Финска не загина ниту еден пешак или велосипедист.
Граѓанската иницијатива НаТочак, група ентузијасти чија заедничка цел е подобро велосипедско Скопје преку активности за кревање на свеста и промовирање на културата на користење велосипед како превозно и рекреативно средство, се огласи по ова прашање и потсети дека „е време да го промениме и нашиот Закон за безбедност во сообраќајот“.
„Во превод, тоа значи дека ‘дифолтното’ ограничување во населени места не треба да биде веќе 50 км/ч, туку 30 км/ч за сите улици, а да добијат можност за 50 км/ч само оние улици кои имаат издвоена и пешачка и велосипедска и колска инфраструктура. Не да се тргнува од 50 км/ч дифолтно, па да се бориме некои улици да бидат со 30 км/ч, туку да се тргне од 30 км/ч, па да видиме кои улици заслужуваат 50 км/ч. Многу логично!“, велат од #НаТочак.
Продолжете да читате: Кога во Скопје ќе се вози со 30 км/ч?
