Уривањето на статуи во САД изминатиов период стана веќе секојдневие. Но, она што сега се случи во Русија веројатно за повеќето е и оправдано.
Градските власти на градот Нововоронеж во текот на вчерашниот ден поставија статуа наречена „Аленка“ во чест на 250-годишнината од основањето на градот, тогаш како село.
Но, статуата не наиде на симпатии кај жителите кои, пак, дури и се уплашија од нејзиниот празен поглед и вонземните црти.
Некои ја опишаа како „повеќе споменик на жртвите од COVID-19“ или пак дека е „зомби Анџелина Џоли“. Некои велат и дека личи на Мерилин Менсон. Статуата веднаш стана популарно меме по руските социјални мрежи.
Реакцијата на жителите ја поддржа и регионалниот сенатор Алексеј Пушкин: „Да, морничава е. Очите ѝ се како на вонземјанин“.
„Не е споменик туки е уметничка инсталација. Нашата работна група ја посвети на настаните со кои се одбележува годишнината на селото Новаја Аленовка. Инсталацијата е само еден уметничкки предмет од многуте планирани настани“, рече Светлана Тулинова, главна на градската администрација.
Според легендата, млада девојка по име Аленка основала населба на бреговите на еден поток. Еден ден била убиена, а нејзините сограѓани ја именувале населбата во нејзина чест. Подоцна истата населба прераснала во денешниот град Нововоронеж, кој се наоѓа близу украинската граница. Брои 32 и пол илјади жители.