Најпрво Honor View 20, па сега и Samsung A8 – изгледа дека денеска е добар ден за промовирање на новите модели на смартфони. А8 ќе биде првиот модел на Samsung со новиот Infinity-O дисплеј, кој има вградена камера под самото стакло на дисплејот.
Изгледа дека „дупката“ во екранот (која не е всушност дупка, туку мал дел од дисплејот во кој е сместена камерата) ќе биде новиот тренд во 2019 година, а Samsung се наметнува како предводник на воведувањето на овој новитет.
Покрај уникатниот 6,4-инчен екран со 2.340 х 1080 пиксели, телефонот ќе биде прилично моќен со оглед на неговата средно-рангирана цена. Тој доаѓа со Snapdragon 710 процесор, 128 GB внатрешна меморија и избор помеѓу верзии со 6GB и 8GB RAM. На задниот дел се наоѓа сет од три камери, слично како и кај Galaxy A7, додека селфи камерата на предниот дел од телефонот ќе биде опремена со сензор од 24 мегапиксели.
Samsung има намера во следната година да се фокусира на проширување на понудата со неколку телефони од средната ценовна класа, со цел да ја одржи предноста во борбата со кинеските ривали како Huawei, Honor и Xiaomi, кои во последната година се покажаа како многу успешни токму во овој сегмент.
Ако 2018 година беше одбележана од малиот „notch“ на врвот на екранот, тогаш отсега може да се забележи дека 2019 година ќе биде запаметена како година на екраните со „дупка“.
Веќе на 17 декември очекуваме да биде претставен Huawei Nova 4, додека моделот Honor View 20 ќе биде достапен на пазарот во Кина веќе од 26 декември. Samsung A8 пристигнува на пазарот во 2019 година, но претпродажбата почнува на 21 декември.
