Huawei ќе се обиде да го победи Samsung во војната за телефони кои се виткаат, а нивниот адут е новиот уред кој има екран со дијагонала од 8 инчи. Овие две компании се само дел од пазарот каде во последниот месец почнаа да се претставуваат сѐ повеќе телефони и таблети со „екрани на виткање“.
Екранот кој се витка ќе го обезбеди компанијата BOE, која стои и зад искривените OLED панели за Mate 20 Pro. Huawei го достави уредот до корејските оператори, пренесуваат локалните медиуми, за кој изворите тврдат дека не е прототип ниту концепт, туку смартфон кој влегува во сериско производство.
„Во моментов не можеме да го откриеме целосниот дизајн, спецификациите и начинот на користење, но знајте дека телефонот е покомплетен отколку што се очекуваше“, стои во официјалната изјава на Huawei за медиумитe.
Од компанијата велат дека имаат намера да го претстават телефонот како уред со 5G интернет брзина а во 2019, за кога е закажана премиерата на овој телефон, 5G мрежата ќе биде достапна само во Јужна Кореја.
Најверојатно Huawei ќе го претстави уредот на саемот Mobile World Congress во февруари наредната година, а потоа ќе го пушти во продажба во периодот од април до јуни, откако ќе ги заврши обемните тестови на 5G мрежата.
Засега не се знае колку висока ќе биде цената на овој смартфон, но знаеме дека екранот на телефонот ќе биде со дијагонала од 8 инчи кога е целосно отворен, односно 5 инчи кога ќе биде „свиткан“. Овие дијагонали се поголеми од оние на моделот на Samsung, кои изнесуваа 7,3 и 4,6 инчи.
