Поголема брзина, поголем екран, помоќна батерија, повеќе камери – вака беа опишани моделите на Samsung од новата линија на смартфони Galaxy S10. Тие беа претставени синоќа на посебен настан организиран од Samsung, а веќе утрово се достапни во продажба.
На прв поглед, новите модели на Samsung изгледаат многу современо. Нивниот дизајн е значително подобрен во однос на претходните верзии, а функционалноста е доведена на максимално ниво. Но, изненадувањата не завршуваат тука.
Вчерашниот настан ни даде поглед кон трите нови модели на Samsung – Galaxy S10, S10 Plus и S10E. Сите три модели влегуваат во продажба уште денеска, а ќе почнат да се испорачуваат до нивните сопственици почнувајќи од 8 март. Почетната цена на Galaxy S10 е 899 долари, додека S10 Plus чини 999 долари.
Најголемите разлики помеѓу S10 и S10 Plus се дисплејот и батеријата, додека сите останати спецификации се помалку или повеќе исти. Моделот S10 доаѓа со 6,1-инчен Dynamic AMOLED дисплеј со Quad HD+ резолуција, додека S10 Plus има нешто поголем, 6,4-инчен екран. Двата модели имаат предна камера од 10 мегапиксели, како и задна камера со три леќи – 12 мегапиксели, телефото леќа од 12 мегапиксели и ултраширока леќа од 16 мегапиксели.
Двата телефони користат процесор Snapdragon 855, а доаѓаат во верзии со 8GB и 12GB RAM. Што се однесува до внатрешната меморија, купувачите можат да одберат помеѓу опции од 128GB до 512GB за S10, односно до 1TB за S10 Plus. Батеријата на моделот S10 е нешто помалку моќна, со 3.400 mAh, додека S10 Plus има батерија со 4.100 mAh.
Најголемиот напредок во однос на претхнодните верзии се наоѓа кај камерата и кај (скоро) совршениот екран, кој овозможува уште подобро корисничко искуство и дава чувство како во раката да држите некоја футуристичка технологија, а не смартфон од денешницата. Можеби овие два модели не се револуционерни како нивниот претходник S8, но во Samsung добро ги имаат проучено силните страни на нивните телефони и тука сето знаење е искористено во подобрување на овие модели.