Корејскиот производител ги објави првите фотографии од новиот модел на камионет пред неговата премиера.
Hyundai се чини е многу зафатен со претставување на нови модели во последно време.
По откривањето на субкомпактниот кросовер Bayon на почетокот на март, следуваа првите фотографии од новото патничко комбе Staria, а пред крајот на минатиот месец го најави и Alcazar – новиот теренец со 7 седишта, насочен кон пазарите во развој.
Промотивните активности продолжија во април, па на самиот почеток на овој месец беше најавена премиерата на камионетот Santa Cruz, кој првенствено е наменет за американскиот пазар, каде ваквите возила се многу популарни.
Моделот кој ќе се бори за примат со Honda Ridgeline и Ford Maverick, ќе биде официјално претставен на 15 април, но Hyundai веќе го откри неговиот надворешен изглед со тизер фотографии.
Santa Cruz стилски се потпира на истоимениот концепт од 2015 година, кој се разликуваше по тоа што имаше 2 врати, како и различна решетка на ладилникот и фаровите, и различни стоп светла од оние што ги гледаме на фотографиите.
Визуелниот идентитет на предниот дел од камионот е модернизиран во однос на концептуалното возило и е прилагоден на најновата генерација на модели на Hyundai, како што е новиот Tucson.
Корејскиот производител наведува дека целта била да направи камионет со возни карактеристики на патничко возило. За тоа сведочи фактот дека Santa Cruz дели механичка платформа со моделот SUV Santa Fe.
Производството започнува годинава во фабрика во Алабама. Засега е непознато дали Hyundai ќе им го понуди овој модел на европските клиенти.
