Нема да има бразилско-аргентинска пресметка и во финалето од Копа Либертадорес откако по Палмејрас, ноќеска и Сантус стигна до финалето.
Откако одиграа без голови на првиот натпревар во Буенос Аирес, сега на својот „Урбану Калдејра“ стадион тимот на Сантус на убедлив начин го завери пласманот во големото финале.
Во 16. минута Питука ја начна мрежата на Бока Жуниорс, а по пазуазата следуваа два брзи гола за само две минути. Во 49-тата венецуелскиот репрезентативец Јеферсон Сотелдо го дуплираше водството, а две минути подоцна Лукас Брага ја запечати судбината на немоќните Аргентинци.
Потоа во 56. минута за да биде сѐ јасно Франк Фабра беше исклучен и гостите останаа со десет играчи, а Сантус без проблеми го затвори натпреварот.
Во првото полуфинале играно ден порано Ривер Плејт победи со 2:0 на гостувањето кај Палмејрас во Саун Пауло, но тоа беше недоволно бидејќи Бразилците победија со високи 3:0 на првиот натпревар во Аргентина. Парагваецот Роберт Ројас во 29-тата и Колумбиецот Рафаел Боре во 44-тата најавија пресврт, кој Ривер после паузата сепак не успеа да го направи.
Големото финале, во кое ќе се сретнат Палмејрас и Сантус, е закажано за 30-ти овој месец на легендарниот „Маракана“ стадион во Рио де Жанеиро. Ќе се игра без публика со почеток во 21:00 часот по македонско време, или 17:00 по локално.
Сантус на овој пехар чека од 2011 кога и последен пат стигна до финале, додека Палмејрас чека дури од 1999 година, а една година подоцна играпе финале, но загуби.