Саботната пресметка со Рома ќе биде петта за само 12 дена за Јувентус, ситуација со која воопшто не е среќен тренерот Маурицио Сари.
Бесен на згуснатиот распоред, стратегот на Јувентус упати закани до Лега Калчо дека во знак на протест в сабота неговиот тим би можел да истрча на терен со младинскиот тим односно оној У23 кој се натпреварува во третата лига.
Заморот кај играчите на „Старата дама“ се виде и синоќа кога на гостувањето на Сардинија загубија со 2:0 од Каљари, иако тука оправдание може да се бара и во немотивираноста бидејќи веќе го заверија Скудетото.
„Имавме повредени играчи и игравме натпревар по само 68 часа. Ние сме единствениот тим во Европа кој игра 5 натпревари за 12 дена, лигата ни направи огромни проблеми“, лут е Сари.
Јувентус допрва го чека продолжувањето на сезоната во Лигата на шампиони, па оттаму Сари би сакал да не ги преморува играчите сега кога веќе нема потреба за тоа.
„Ќе видиме како ќе се чувствуваат играчите утре. Можно е в сабота против Рома да го извадам У23 тимот за првотимците да се одморат“, вели тој.
Претходно ист проблем со календарот имаше и Интер. Антонио Конте исто така распука по Лега Калчо бидејќи и неговиот имаше натрупани натпревари со малку денови одмор и токму тогаш ја загуби битката за титулата.