Клубот од Рим веднаш најде замена за испразнетото столче по заминувањето на Симоне Инѕаги и тоа во поранешниот предводник на Јуве, Челси, Наполи и Емполи.
Маурицио Сари го прекинува едносезонскиот одмор и седнува на клупата на „Бјанкочелестите“. Самиот клуб денеска го потврди ангажирањето на новиот стратег.
„СС Лацио соопштува дека Маурицио Сари е нов тренер на првиот тим“, кратко објави клубот на официјалната веб-страница, а на интересен начин веста ја соопшти на Twitter објавувајќи само смајли со цигара која гори, асоцирајќи на она по кое е препознатлив Сари, пушењето.
„Лацио го одбра стратегот чиј рејтинг е во линија со потребата да се консолидира и издигне тимот, во Италија и во Европа, тренер каков што управата, навивачите и тимот заслужуваат да имаат“, напиша претседателот Клаудио Лотито.
62-годишниот Сари беше без ангажман од минатото лето кога заработи отказ од Јувентус иако го освои Скудетото. Причината беше раното испаѓање од Лигата на шампионите и тоа од Лион.
Саро долги години беше предводник на нисколигаши сѐ до периодот 2012-2015 кога се прослави водејќи го Емполи од Серија Би во А. Потоа седна на клупата на Наполи каде за 4 сезони секогаш беше при врвот, но секогаш зад Јуве, потоа се префрли во Челси со кој ја освои Лига Европа, но по само една сезона се врати на Чизмата преземајќи го Јувентус.
Клупата на Лацио остана празна откако Симоне Инѕаги одлучи кариерата да ја продолжи предводејќи го шампионот Интер.