Музејот на Град Скопје на својата Фејсбук страница денеска соопшти дека во населбата Карпош 4, во близина на слаткарницата Палма, на 24.07.2019 при реконструкција на улица, пронајдени се камен саркофаг и три елементи на надгробен Олтар кои потекнуваат од римски период 2 век од наша ера.
Порталот Плус инфо претходно прв објави дека „на булеварот Партизански одреди при ископ на фекална канализација од страна на град Скопје, откриени се римски надгробни олтари (кипуси) и камен саркофаг од вториот век“, како извор на веста наведувајќи го Конзерваторскиот центар Скопје.
Пронајдоците биле извадени во присуство на Вера Атанасовска, археолог виш конзерватор и директорот Коле Чапкановски, како и Ленче Јованова, археолог, советник-кустос, вработена во ЈУ Музеј на град Скопје, стои во објавата.
Во соработка со Град Скопје тие ќе бидат пренесени на археолошкиот локалитет Скупи.