Саудиска Арабија денеска соопшти дека јавните кина ќе бидат пуштени во функција, а првите филмски проекции најверојатно ќе бидат прикажани кон почетокот на следната година.
„Како индустриски регулатор, општата комисија за аудиовизуелни медиуми започна процес на давање на дозволи на киносалите во Кралството“, стои во соопштението за јавноста.
„Очекуваме првите кина да бидат отворени во март 2018 година“, вели саудискиот министер за култура и информирање.
На тој начин на тамошните кина ќе и биде овозможено да работат после повеќе од 35 години, а ова воедно е и последниот потег кој е дел од напорот на младиот саудиски принц Мухамед бин Салман да воведе социјални реформи во земјата.
Кралството пренесува дека денеска е усвоена резолуција која го отвора патот за давање на дозвола за комерцијални кина.
Саудиските власти ја забранија работата на кината во 80-тите години од минатиот век, која во тој период ја зафати голем бран на ултраконзерватизам.
Принцот Мухамед бин Салман инсистира на поголема друштвена отвореност, вклучувајќи и укинување на забраните за возење за жени, односно повторно воведување на концерти и останати форми на забава, како би ги задоволил желбите на помладите граѓани.