Саудиска Арабија ги отфрли обвинувањата на САД дека ја поддржува Русија со намалување на производството на нафта за да ја крене цената на овој енергенс, инсистирајќи дека тоа било чисто деловна одлука.
„Запрепастени сме од обвинувањата дека кралството ја поддржува Русија во војната со Украина“, порача саудискиот министер за одбрана, принц Калед бин Салман.
Организацијата ОПЕК предводена од Саудиска Арабија, а во која е вклучена и Русија, го налути Вашингтон со одлуката од ноември да го намали производството за два милиони барели дневно, кревајќи ги и онака високите цени на нафтата.
„Иран исто така е членка на ОПЕК, дали и тоа значи дека кралството го поддржува и Иран?“, праша принцот.
Одлуката на Саудиска Арабија да ја зголеми цената на нафтата е сфатена како дипломатска шлаканица за претседателот Џо Бајден поради зголемувањето на цените на американските потрошувачи пред ноемвриските избори за Конгресот.
Односите меѓу САД и Саудиска Арабија се затегнати, а американскиот советник за национална безбедност Џејк Саливан изјави дека Бајден не планира средба со принц Мохамед на самитот Г20 во Индонезија.