Селекторот на Саудиска Арабија ги демантираше шпекулациите дека кралското семејство на секој фудбалер ќе му подари Rolls Royce по победата над Аргентина.
Во објави на социјалните мрежи стоеше дека секој член на тимот од 26 играчи ќе добие Rolls Royce Phantom од престолонаследникот Мохамед бин Салман по победата, но 54-годишниот Французин Ерве Ренар го демантираше тоа.
„Не е точно. Имаме сериозен сојуз и Министерство за спорт, не е време да се добие такво нешто во овој момент. Не знам дали се сеќавате на пресот пред натпреварот со Аргентина. Изјавив дека тој натпревар е еден од трите најважни што мора да ги одиграме. Единствена цел беше да завршиме меѓу првите две екипи во групата и да одиме понатаму“, изјави Ренар.
И напаѓачот Салех ал Шехри, кој го постигна голот против Аргентина, објасни дека за нив е доволна наградата што победија и дадоа сè од себе.
„Не е точно дека ќе добиеме автомобили. Овде сме да ѝ служиме на нашата земја и да дадеме сè од себе. Тоа е доволна награда“, изјави тој.
Саудиска Арабија беше поразена од Полска со резултат од 2:0, а дали ќе продолжат понатаму зависи од средбата со Мексико.
