По три сезони, серијата And Just Like That... на HBO како продолжение на култната Sex and the City, е официјално откажана. Главната актерка и продуцентка Сара Џесика Паркер се збогуваше со својот лик со емотивна порака.
Паркер објави емотивно писмо на Instagram во кое им се заблагодари на сите што ја создадоа серијата со неа, но и на гледачите кои ја сакаа и ја поддржуваа Кери со години, иако понекогаш ја осудуваа.
„Кери Бредшо доминираше во мојот професионален живот 27 години. Мислам дека јас ја сакав најмногу. Знам дека другите ја сакаа, беа фрустрирани од неа, но и навиваа за неа. Таа симфонија од емоции беше најважниот придружник. Засекогаш сум благодарна“, напиша Паркер, потврдувајќи дека ова поглавје е завршено.
Таа додаде дека таа и креаторот на серијата Мајкл Патрик Кинг заеднички одлучија дека And Just Like That... нема да има нова сезона. Серијата, рече таа, беше „радост, авантура и најубав вид на напорна работа во соработка со неверојатна екипа и повеќе од 380 членови на продукцијата“.
A statement from our showrunner, writer and director Michael Patrick King. pic.twitter.com/MnQeHbSl8W
— And Just Like That... (@AndJustLikeThat) August 1, 2025
And Just Like That... ги соедини Кери, Миранда и Шарлот во Њујорк, но без Саманта, која се појави само во кратка сцена на крајот од втората сезона. Серијата се обиде да балансира помеѓу носталгијата и социјалните теми, но реакциите на публиката и критичарите беа поделени. Некои ги пофалија новите ликови, додека други го критикуваа дијалогот, наметнатиот тон и наративната дезориентација.
Сепак, рејтинзите беа солидни, а крајот на третата сезона остави можност за продолжение што не се случи. Оригиналната серија Sex and the City се емитуваше на HBO од 1998 до 2004 година, шест сезони и 94 епизоди. Освои седум награди Еми, осум Златни глобуси и милиони обожаватели низ целиот свет. По неа следеа два филма, а потоа и продолжението And Just Like That... кое почна да се емитува во 2021 година.
Серијата отворено зборуваше за женската сексуалност, пријателството, модата и модерните предизвици на животот во големиот град. Кери, Миранда, Шарлот и Саманта станаа икони на поп-културата.
