Џулија Робертс веќе со децении важи за една од најхаризматичните актерки во Холивуд.
На почетокот од кариерата пленеше со романтични комедии и трилери, а подоцна доби сериозни актерски пофалби за филмот Erin Brockovich, за кој освои Оскар. Но, дури и во кариерата на големи ѕвезди има промашувања.
Еден од најлошо оценетите филмови во нејзината кариера беше I Love Trouble – романтичен трилер од 1994 година во кој глуми новинарка од Чикаго која се натпреварува со колега од конкуренциска редакција, кого го игра Ник Нолти. Иако на хартија звучи како класична романтична збрка, филмот се покажа како целосно промашување – и кај критичарите и кај публиката.
Проблемот не беше само во недостатокот на хемија меѓу главните актери, туку и во сценариото полно со несмасни реплики – како онаа кога Нолти го поздравува нејзиниот лик со зборовите: „Извини, од каде рече дека си? Кучковил?“
Но, вистинската причина за целосната неубедливост беше длабокиот анимозитет меѓу главните актери. Нивната нетрпеливост стана позната и надвор од сетот, а двајцата беа неверојатно искрени за тоа години подоцна. Џулија Робертс го нарече Нолти „одвратен човек“, додека тој возврати дека и таа „не е баш добра личност“. Имаше гласини дека некои сцени биле снимани со дублери наместо нив – нешто што Робертс подоцна го негираше, но не го бранеше филмот.
Во интервју за Vanity Fair во 1999 година изјави: „Не знам што сè реков за филмот I Love Trouble, освен дека беше ѓубре. Не е тајна дека Ник и јас не се сложувавме“, пренесува Far Out Magazine.
Без оглед на тогашната популарност на Робертс, филмот пропадна. Покажа дека ниту познатите имиња не можат да спасат проект кој нема ниту сценарио, ниту хемија, ниту меѓусебно почитување меѓу главните ѕвезди. Актерката продолжи да гради кариера со успешни улоги, но овој филм остана еден од најочигледните потсетници дека дури ни најголемите ѕвезди не можат секогаш да избегнат катастрофа.
