Во официјалниот трејлер за четвртата сезона на популарната серија The Witcher на Netflix, имаме шанса малку подобро да го погледнеме Лиам Хемсворт во улогата на легендарниот Гералт од Ривија. Заплетот го следи неговата очајничка потрага по Сири (Фреја Алан), додека војната го распарчува континентот, а непријателите го демнат на секој чекор, пишува Deadline.
Според официјалниот синопсис, сезоната продолжува со драматичните настани на крајот од третата сезона што го променија балансот на моќ на континентот. Гералт, Јенефер и Сири се разделени и принудени сами да се соочат со опасностите од еден свет разурнат од војна. „Ако успеат да ги прифатат и да ги водат групите отпадници во кои се наоѓаат, имаат шанса да го преживеат огненото крштавање и повторно да се пронајдат“, се вели во најавата. Трејлерот го прикажува Гералт како води необична група авантуристи низ низа мрачни и опасни локации.
Заедно со Хемсворт, во серијата ќе се појави и Лоренс Фишбурн како Реџис, саканиот лик од книгите и видеоигрите The Witcher. Реџис, кој првпат се појавува во романот „Огнено крштавање“ од Анджеј Сапковски, е поранешен бербер и хирург со мистериозно минато кој му се придружува на Гералт на неговото патување.
Во серијата се враќаат и Ања Чалотра како Јенефер, Фреја Алан како Сири и Џои Бејти како бардот Јаскиер. Продуцентскиот тим го предводат Стив Гауб, Мет О'Тул, Мајк Островски, Хавиер Грило-Марксуах, Лорен Шмит и тимовите на Platige Films и Hivemind Content.
Четвртата сезона на The Witcher премиерно се прикажува на 30 октомври на Netflix. Обожавателите може да очекуваат напнато продолжение на приказната за магија, предавство и искупување и нова ера на Гералт од Ривија под водство на Лиам Хемсворт откако Хенри Кавил го напушти проектот.
Неговото заминување, како и изборот на Лиам Хемсворт за улогата, најпознат по неговата улога во филмовите од франшизата The Hunger Games, предизвикаа негативни критики од многу обожаватели. Истото се случува и со коментарите по објавувањето на официјалниот трејлер, кој, исто како и првиот тизер, има повеќе лоши отколку добри критики.
„Ова изгледа како Гералт од пониска класа“, „Запомнете, не е виновен актерот, туку продуцентите што го натераа Хенри да се откаже“, „Знам дека не е виновен Лиам што ја прифати улогата, но ова изгледа навистина лошо“, „Без разлика колку се труди, Лиам никогаш нема да биде толку добар Гералт како што беше Хенри. Тој едноставно е роден за улогата“, „Колку повеќе содржина гледам за новата сезона, толку помалку сакам да ја гледам“, „Не сакам да го гледам ова, изгледа ужасно“, се само некои од коментарите.
