Од почетокот на декември, македонскиот филм „Диџеј Ахмет“ во режија на Георги М. Унковски ќе започне со редовни проекции во Кинотеката на Македонија. Публиката ќе има можност да го проследи филмот на следните термини:
1 декември (18:00 ч.), 2 декември (18:00 ч.), 3 декември (20:00 ч.), 11 декември (20:00 ч.) и 20 декември (20:00 ч.).
Цената на влезницата изнесува 150 денари.
„Диџеј Ахмет“ е дебитантски долгометражен филм на Унковски, кој ja прикажува емотивнаta приказна за 15-годишниот Ахмет, тинејџер од јуручко село во Македонија, кој го игра младиот актер Ариф Јакуп. Ахмет наоѓа засолниште во музиката, обидувајќи се да се справи со строгите очекувања на својот татко, конзервативната средина и првото љубовно искуство со девојка која веќе е ветена на друг.
Филмот е копродукција меѓу „Синема футура“ и „Сектор филм“ од Македонија, „Алтер вижн“ и „Аналог вижн“ од Чешка, како и „Бекрум продукција“ и „Баш Челик“ од Србија.
Својата светска премиера „Диџеј Ахмет“ ја имаше на престижниот фестивал во Санденс на 23 јануари 2025 година, каде што освои две награди: наградата од публиката во програмата World Cinema и Специјалната награда на жирито за креативна визија. По Санденс, филмот беше прикажан и на Сараевскиот филмски фестивал, каде се натпреваруваше за наградата Срцето на Сараево, а македонската премиера се одржа на затворањето на фестивалот „Браќа Манаки“ во септември 2025 година.
Во актерската екипа, покрај Ариф Јакуп, настапуваат Агуш Агушев, Дора Акан Златанова, Аксел Мехмет, Селпин Керим, Атила Клинче, Наџи Шабан, Елхаме Билал и други.
Со емотивен пристап и свежа режисерска енергија, филмот на Унковски ветува да привлече широка публика и да продолжи успешниот пат започнат на светските филмски фестивали.
Целосниот репертоар на Кинотека за декември погледнете го ТУКА.
