На денешен ден, 10 февруари, во далечната 1940 година, светот за прв пат ги запозна легендарните ликови на мачорот и глушецот во цртаниот филм „Клоца за мачорот“. Иако во тоа време не се викале Том и Џери, овој цртан филм беше пресвртница што ја лансираше една од најпознатите анимирани франшизи на сите времиња.
Во овој анимиран краток филм, мачорот Џаспер (оригиналното име на Том) и глушецот Џинкс (оригиналното име на Џери) се вклучуваат во класична игра на надмудрување. Заплетот го следи Џаспер, кој се обидува да го фати глушецот, но во тој процес несвесно крши вазна. Неговата строга сопственичка, Мами Ту Шус, го предупредува дека ако скрши уште еден предмет, ќе биде исфрлен од куќата.
Џинкс вешто го користи ова во своја корист и предизвикува хаос, принудувајќи го Џаспер да го направи токму она што не треба - да скрши уште нешто. На крајот, Мами Ту Шус си го одржува зборот и мачорот со клоца го бркаат од куќата.
Цртаниот филм го режираа Вилијам Хана и Џозеф Барбера, додека Фред Квимби беше продуцент. Анимацијата беше направена под покровителство на студиото MGM, а ликовите покажаа исклучителна хемија што ја воодушеви публиката уште од првото појавување.
Иако ликовите првично имаа различни имиња, наскоро беа преименувани во Том и Џери - имиња кои сега се синоним за класична анимација.
„Клоца за мачорот“ (Puss Gets the Boot) постигна голем успех и дури беше номиниран за Оскар за најдобар краток анимиран филм. Иако не ја освои наградата, MGM го препозна потенцијалот на овие ликови, што доведе до развој на целиот серијал.
