Времето на Викинзите и временското доба опфатено во The Odyssey се оддалечени околу 200 години, па како викиншки брод заврши во овогодинешниот блокбастер на режисерот Кристофер Нолан? Причината лежи во опсесијата на Нолан да создаде спектакл со вистински реквизити и вистински сцени, пишува француската агенција AFP.
Сепак, треба да им се оддаде признание и на норвешките бродоградители и морнари кои изградија историски брод кој во исто време му одговара на Холивуд. Со дабова палуба лепена со катран, и 50 смрекови весла, Draken Harald Harfagre е најголемата модерна реплика на викиншки брод.
Не беше важно што бродот мораше да се ослободи од своите скандинавски корени заради грчката митологија, анахронизмот сепак се вклопуваше во разбирањето на Нолан за реализмот, пишува AFP.
За потребите на филмот, главата на змејот, карактеристична за викиншкиот период од осмиот до 11-тиот век, беше отстранета од предниот дел на бродот, а тој пловеше пред камерите во грчки, италијански и шкотски води.
„Најдовме викиншки брод изграден точно според тие антички спецификации. И тоа беше токму обликот што ни беше потребен за брод од бронзеното доба“, рече Нолан на американската телевизија минатиот месец.
„Го зедовме екипажот и го облековме во нашите костими. Тие станаа дел од филмската екипа. И им се придружија луѓето на Одисеј, актерите, и тие научија како да го кренат едрото, како да го управуваат, како да веслаат, сè тоа.“
Со месеци, екипажот на викиншкиот брод соработуваше со холивудската ѕвезда Мет Дејмон, кој го игра Одисеј во филмот, но и со голем број други професионални актери.
Врз основа на епот на Хомер, филмот на Нолан го следи херојот Одисеј на неговото опасно враќање дома на островот Итака по Тројанската војна во 12 век п.н.е. Наместо да го пресоздаде на компјутер, Нолан сакал вистински брод способен да плови по отворено море со екипаж од крв и месо.
„Повеќето сцени би биле сосема поинакви ако не бевме таму, правејќи вистински работи со вистински брод и вистински екипаж во вистински океан во реално време“, рече Емануел Персон, кој е задолжен за управување со експедицијата Draken.
„Мислам дека гледачите навистина можат да ги почувствуваат автентичните материјали. Не знам дали навистина можете да го почувствувате мирисот на катранот, но можете да видите дека тоа е навистина автентична изработка, а не дигитална креација“, додаде тој.
