Кристијано Роналдо влегува во филмскиот бизнис

Кристијано Роналдо, еден од најпознатите фудбалери на денешницата, одлучи да зачекори во светот на филмот. Во соработка со познатиот британски режисер Метју Вон, тој го основа независното филмско студио UR•Marv, кое има за цел да ја револуционизира филмската индустрија.

UR•Marv е замислен како иновативна платформа која комбинира напредна технологија со традиционални начини на филмска продукција, пишува Variety. Фокусот ќе биде ставен на акционите филмови кои би можеле да го редефинираат жанрот. Првите два проекта на студиото се веќе завршени, додека третиот е во развој и сите се дел од истата серија.

„Ова е возбудлив период за мене додека се префрлам во нови деловни потфати“, рече Роналдо.

Метју Вон се прослави со успешните филмови како Kick-Ass, Kingsman и X-Men: First Class. Неговата работа има специфичен визуелен идентитет и брза нарација, што го прави идеален креативен партнер за Роналдо.

„Кристијано постигна нешто со своите настапи на теренот што ги надминува моите сценаристички вештини. Заедно создаваме филмови кои ќе ги инспирираат другите. Тој е вистински суперхерој“, изјави Вон.

UR•Marv не е првиот чекор на Вон надвор од режијата, неговото студио Marv со години продуцира филмови и развива франшизи, вклучувајќи ги и претстојните продолженија на Kingsman.

Роналдо веќе некое време се обидува активно да се вклучи во медиумската индустрија. Тој инвестираше во португалскиот медиумски конгломерат Medialivre, а во 2024 година го отвори каналот на YouTube UR Cristiano, каде што споделува лични приказни, предизвици и содржини од неговиот секојдневен живот со обожавателите.

Овие потези јасно ја покажуваат неговата амбиција да ја обезбеди својата позиција во светот на забавата и медиумите, за да остане релевантен и влијателен и по кариерата на спортските терени.