Синоќа се одржа на 77-то доделување на наградите Еми, вечер посветена на најистакнатите и најхрабрите телевизиски серии на годината. Домаќин на вечерта беше комичарот Нејт Баргаци, а иако сериите Severance и The White Lotus имаа по десет номинации, вечерта донесе бројни изненадувања и неколку непријатни моменти.
Иако беше меѓу најфалените серии на годината, The White Lotus на крај не освои ниту една награда. И покрај големите очекувања и силната конкуренција, серијата не успеа да ги надмине насловите како Severance и The Pitt и остана со празни раце.
Во категоријата Најдобра актерка во споредна улога во драмска серија фаворитки беа актерките од The White Lotus – Кери Кун, Паркер Поузи, Наташа Ротвел и Ејми Лу Вуд. Но, поделбата на гласовите меѓу нив ѝ овозможи победа на Кетрин ЛаНаса од серијата The Pitt.
Со оглед на богатата кариера и фалената улога во серијата Matlock, се очекуваше Кејти Бејтс да ја однесе наградата за најдобра актерка во главна улога во драмска серија. Сепак, наградата ја освои Брит Лоуер за моќната изведба во серијата Severance.
Еден од најсимпатичните моменти на вечерта беше победата на Џеф Хилер, кој беше награден како најдобар спореден актер во хумористична серија. Иако беше помалку познато име од серија со помала гледаност, неговиот искрен и шармантен говор ја воодушеви публиката. По ова признание, многумина сигурно ќе посакаат да ја погледнат Somebody Somewhere.
И покрај ѕвездениот статус и силната промотивна кампања, Колин Фарел не успеа да освои Еми. Иако неговата партнерка Кристин Милоти беше наградена, тој изгуби во категоријата актер во главна улога во минисерија. Наградата ја доби Стивен Греам за серијата Adolescence, која самиот ја креираше.
Доделувањето не помина без гафови. Актерот Џејсон Бејтман погрешно го изговори името на победникот Трамел Тилман, додека водителот Баргаци имаше проблеми со изговорот на имињата на членовите на групата Little Big Town. Особено непријатна беше ситуацијата кога Елизабет Бенкс ги пофали петте номинирани режисерки, а наградата сепак ја доби единствениот маж меѓу нив – Филип Барантини.
Иако е познат по прецизното темпирање во стендап настапите, Нејт Баргаци оваа вечер не се снајде најдобро. Често запнуваше и го губеше ритамот во шегите, а особено збунувачка беше нејасната шега за „тексас оделото“, која многумина ја протолкуваа како алузија на појавувањето на актерката Сидни Свини.
Целосната листа на наградени може да ја погледнете ТУКА.
