Netflix ја откажува можноста за емитување содржина (cast) од мобилни уреди на бројни телевизори.
Според страницата за помош, на која први укажаа од Android Authority, „Netflix повеќе не поддржува cast на ТВ емисии и филмови од мобилни уреди на повеќето телевизори и уреди за стриминг. За да го користите Netflix, ќе треба да го користите далечинскиот управувач што доаѓа со вашиот телевизор или уред за стриминг“.
Компанијата забележува дека опцијата cast сè уште треба да работи на постари уреди Chromecast и телевизори што поддржуваат Google Cast, но само за корисници со пакет без реклами. Меѓутоа, ако имате Google TV Streamer, Chromecast со Google TV или телевизор со Android TV, функцијата cast можеби повеќе нема да биде достапнa во апликацијата Netflix, пишува Engadget.
Се чини дека Netflix тивко ја укинува поддршката за cast во последните недели, а некои корисници пријавија дека функцијата повеќе не им е достапна уште во средината на ноември.
Овој потег на Netflix разочарува многу корисници, бидејќи на многумина им е полесно да пронајдат содржина што сакаат да ја гледаат на мобилната апликација, а потоа да ја „кастнат“ на својот телевизор. На пример, ако задремете додека гледате, многу е побрзо да се вратите таму каде што сте застанале со прелистување низ епизода или филм на вашиот мобилен уред отколку да го користите далечинскиот управувач во ТВ апликацијата.
