Хорор-франшизата Saw, која стана феномен на поп-културата по премиерата на првиот филм во октомври 2004 година, добива единаесетто продолжение.
По неколку обиди за оживување на франшизата со филмови како Jigsaw (2017), Spiral: From the Book of Saw (2021) и Saw X (2023), проектот Saw XI продолжува со реализација, пренесува MovieWeb.
Студиото Lionsgate го ангажираше режисерот Мајк П. Нелсон да го води проектот, а сценариото го напишаа Грегори Вајдман и Џеф Ток. Досега, франшизата има заработено 1,1 милијарда долари на светските киноблагајни.
Deadline прв објави дека Мајк П. Нелсон ќе го режира Saw XI. Во хорор-жанрот, Нелсон е познат по филмови како The Domestics, Wrong Turn и Silent Night, Deadly Night.
Неговиот најнов филм, Beware Boiúna, имаше премиера на фестивалот Fantastic Fest, а во кината треба да пристигне на 2 октомври во дистрибуција на Lionsgate – истото студио што стои зад серијалот Saw.
„Можноста да работам со Џејмс Ван во овој изопачен свет за мене е буквално остварување на сонот“, изјави Нелсон. „Грег, Џеф и Џејмс создадоа неверојатно сценарио што ја враќа мистеријата на оригиналот, а истовремено истражува нови, луди и крвави идеи кои совршено се вклопуваат во бруталниот морален компас на франшизата. Нека започнат игрите.“
Патот на филмот Saw XI до неговата реализација беше сложен. Првично беше планирано премиерата да се одржи на 24 септември 2024 година под насловот Saw XI, но подоцна датумот беше поместен за 26 септември 2025 година. Во март 2025 година, Lionsgate целосно го повлече филмот од распоредот за прикажување поради креативни несогласувања меѓу продуцентите Орен Кулс и Марк Бург.
Кулс и Бург сепак ќе учествуваат во новиот филм, но како извршни продуценти. Новото продолжение беше најавено и на официјалниот профил на филмот Scramble X преку кратко видео со прашањето: „Дали ви недостигав?“
did you miss me? pic.twitter.com/c6tpQwanFF
— SAW (@Saw) September 24, 2026
Џејмс Ван, режисерот на оригиналниот филм, ќе биде и извршен продуцент на единаесеттиот филм. Неговата улога стана позначајна откако Blumhouse Productions го откупи уделот на Twisted Pictures во франшизата во јуни 2025 година.
Ова преземање му овозможи на Ван креативна контрола врз серијалот што самиот го создаде, а неговата продукциска куќа Atomic Monster се спои со Blumhouse во јануари 2024 година. Ова е прво директно вклучување на Ван во франшизата уште од филмот Saw 3 од 2007 година.
„Снимањето на оригиналниот филмбеше пресвртно искуство за мене, па затоа ми беше исклучително важно да најдам режисер кој ќе го почитува тој свет“, изјави Ван. „Мајк има автентичен и препознатлив режисерски стил и иновативен пристап кон жанрот. Верувам дека тој ќе внесе нешто навистина уникатно и посебно во франшизата.“
Адам Фогелсон, претседател на Lionsgate Motion Picture Group, го коментираше враќањето на Ван и ангажирањето на нов режисер.
„Фактот што Џејмс Ван се враќа во оваа франшиза со толкава страст, зборува сам по себе. Неговата доверба во Мајк потсетува на неговиот сопствен пробив со оригиналниот филм“, рече Фогелсон.
„Мајк е еден од најперспективните творци кои ја обликуваат следната генерација на хорор-филмови. Тој има јасна визија за овој филм и имаме целосна доверба во она што ќе го создаде.“
