Памела Андерсон присуствуваше на Филмскиот фестивал во Венеција, каде што зборуваше за својата борба со хепатитис Ц.
Актерката беше на гала настан организиран од amfAR, каде што ѝ беше доделена Наградата за храброст. Андерсон рече дека кога ѝ била дадена дијагнозата, немало лек. Во емотивен говор, таа се присети на зборовите на докторот.
„Тоа беше смртна пресуда. Мојот доктор ми рече дека веројатно имам уште околу 10 години живот“, се присети таа.
Додаде дека се плашела за своите деца повеќе од самата смрт и дека искуството целосно ѝ го променило животот.
Лек за вирусната инфекција, рече Андерсон, бил пронајден во 2011 година, а до 2015 година таа била целосно излекувана. Сепак, рече дека третманот ја чинел сè што имала на нејзината банкарска сметка.
Андерсон, исто така, зборуваше за чувствата на срам и вина што ја придружувале, поврзувајќи ги со траумата од детството и сексуалната злоупотреба што ја претрпела. Таа призна дека сè уште не се опоравила целосно од веста за нејзината дијагноза, но дека можеби сега конечно се помирила со искуството.
„Јас не сум жртва, јас сум победник. Јас сум силна и способна, повеќе отколку што некогаш можев да сонувам“, рече таа.
Таа изјави дека преку уметноста пронашла начин да ја изрази својата вистина и да ја обнови својата кариера, во која во последните години прифатила значајни улоги во филмовите The Naked Gun, Rosebush Pruning и Place to Be, чија премиера е на Венецискиот филмски фестивал в среда.
Гала вечерта во хотелот Hilton Molino Stucky Venice ја водеше Таика Ваитити, а меѓу добитниците на награди беше и Марина Абрамовиќ, која ја доби Наградата за инспирација.
