Филмските љубители ширум светот добија нова причина за возбуда откако Sony Pictures го објави првиот трејлер за романтично-фантастичниот филм A Big Bold Beautiful Journey.
Во главните улоги се појавуваат славната Марго Роби и ирскиот актер Колин Фарел, а нивната заедничка хемија и визуелната магија на филмот веќе ги освојуваат социјалните мрежи и филмските портали.
Режисер на филмот е јужнокорејскиот автор Когонада, познат по критички пофалените остварувања Columbus и After Yang, како и по серијата Pachinko. Овојпат, Когонада нуди маестрална приказна за двајца непознати кои, преку магичен реализам, ги истражуваат темите на сеќавањето, љубовта и судбинските средби. Покрај Роби и Фарел, во актерската екипа се појавуваат и Џоди Тарнер-Смит, Лили Рејб, Фиби Волер-Бриџ и Хамиш Линклејтер.
Според официјалниот синопсис, A Big Bold Beautiful Journey е визуелно прекрасно и емоционално слоевито дело што ги носи гледачите на патување низ времето и спомените. Колин Фарел во интервју за Collider го опиша филмот како „љубовна приказна, но не во класичната смисла“. Тој истакна дека клучната тема е можноста минатото повторно да нè посети, но и сами да добиеме шанса да се вратиме во оние моменти што нè обликувале.
Сценариото го потпишува Сет Рајс, познат по сатиричната драма The Menu, а меѓу продуцентите се Дан и Рајан Фридкин, Јури Хенли, Рајс и Бредли Томас. Когонада, Ори Ајзен, Џино Фалсето, Ајлин Фелдман и Пол Мези се извршни продуценти.
Овој филм претставува прв актерски проект за Марго Роби по огромниот успех на Barbie од 2023 година. Во меѓувреме, таа се посвети на продуцентска работа и учествуваше во проекти како Saltburn, My Old Ass и во претстојниот трилер Borderline. Во моментов, Роби работи на адаптацијата на романот Wuthering Heights (Оркански висови) на Емили Бронте, под режисерската палка на Емералд Фенел.
Колин Фарел, пак, годинава ја освои престижната награда SAG за улогата на Освалд Коб во HBO серијата The Penguin, со што уште еднаш го потврди својот статус како еден од најталентираните актери на денешницата.
A Big Bold Beautiful Journey во кината пристигнува на 19 септември, а судејќи по трејлерот, гледачите ги очекува незаборавно патување низ времето, љубовта и магијата на сеќавањето.
