Филмскиот спектакл Gladiator од 2000 година, во режија на Ридли Скот, ја врати популарноста на жанрот мечеви и сандали и му донесе Оскар на главниот актер Расел Кроу.
Дваесет и пет години подоцна, Кроу призна дека не е обожавател на неодамнешното продолжение Gladiator II, тврдејќи дека му недостасува клучен елемент што го направил оригиналот ремек-дело.
Имено, актерот бил вознемирен од главната премиса на продолжението - откриена во промотивните материјали за филмот од 2024 година - дека Луциус (Пол Мескал) е всушност вонбрачен син на неговиот лик Максимус, објавува The Playlist.
Кроу верува дека таков заплет, за кој нема ниту трага во оригиналниот филм, го поткопува „моралното јадро“ на неговиот лик.
„Мислам дека неодамнешното продолжение, кое, знаете, не треба да го именуваме, е навистина несреќен пример за тоа како дури и луѓето во системот не разбираат што го направило првиот филм посебен“, рече Кроу во неодамнешно интервју за австралискиот медиум Triple J. „Не стануваше збор за помпезноста. Не стануваше збор за околностите, не стануваше збор за дејството. Стануваше збор за моралното јадро.“
Актерот потсети дека целата приказна од првиот филм се темели на посветеноста на Максимус да ја одмазди својата убиена сопруга и син. Идејата дека посветениот семеен човек имал афера со Лусила (Кони Нилсен), ќерката на царот Марко Аврелиј, е неприфатлива за Кроу бидејќи ја поткопува основата врз која е изграден ликот.
Тој, исто така, откри дека дури и за време на снимањето на оригиналниот филм, морал да се бори за да го зачува интегритетот на ликот на Максимус.
„На тој сет буквално имало постојана борба. Тоа била секојдневна борба да се одржи тоа морално јадро на ликот“, се присети Кроу.
„Повеќе пати беа предлагани секс сцени и слични работи за Максимус, а тоа, по мое мислење, му ја одзема силата. Значи, сакате да кажете дека додека имал жена се е*ел со оваа другава? Што зборувате? Тоа е глупост.“
И покрај критиките на Кроу, Gladiator II беше огромен успех минатата година. Филмот заработи 462,1 милиони долари на светските киноблагајни и доби претежно позитивни критики од критичарите. Режисерот Ридли Скот веќе навести можност за трето продолжение, откривајќи дека веќе почнале да запишуваат идеи за сценарио.
