Оскаровецот го изнесе своето предвидување дека Доналд Трамп „никогаш нема да ја напушти“ функцијата и дека останува на Американците да се „ослободат од него“.
Додека Доналд Трамп држеше речиси двочасовно обраќање за состојбата на нацијата, во време кога неговата поддршка во економските анкети опаѓа, добитникот на Оскар Роберт Де Ниро одржа емотивен говор во кој ги повика луѓето да „се спротивстават“ на Трамп и неговата администрација.
Де Ниро, долгогодишен и жесток критичар на Трамп, се појави на MS NOW за да зборува за сегашниот претседател на САД, споделувајќи го своето верување дека Трамп „никогаш нема да си замине“ и дека останува на Американците да се „ослободат од него“, објавува Euronews.
„Тој никогаш нема да си замине. Мораме да го натераме да си замине“, рече актерот. „Сега се шегува за национализација на изборите. Не се шегува. Веќе видовме доволно.“
На прашањето дали мисли дека Трамп ќе си замине за три години, во согласност со Уставот, кој предвидува дека никој не може да биде избран за претседател повеќе од два мандата, 82-годишната филмска легенда одговори: „Тој нема да си оди. Никако. Да не се лажеме. Тој нема да си оди. Од нас зависи да се ослободиме од него.“
Тој продолжи: „Станува збор за нашата земја, а Трамп ја уништува, и којзнае кои се неговите причини, но тоа е болно, тоа е зае*ано. Мораме да ја спасиме оваа земја.“
„Сè што знам е дека луѓето мора да се спротивставуваат, да се спротивставуваат, да се спротивставуваат. Нема лесен начин. Нема да ви дојде лесно. Знаете, доаѓа момент во вашиот сопствен живот и вашата борба за опстанок кога треба да направите нешто. Мора да скокнете и да поминете низ оган затоа што ако не поминете низ оган, нема да излезете - и тоа е она што мора да го направиме.“
Пред обраќањето на Трамп за состојбата на нацијата, анкета на Reuters/Ipsos покажа дека шест од 10 Американци веруваат дека Трамп станал понестабилен со текот на годините, при што 61 процент од испитаниците (89 проценти од демократите, 30 проценти од републиканците и 64 проценти од независните) велат дека би го опишале Трамп како некој што „станал понестабилен со текот на годините“.
Анкетата, исто така, покажа дека мнозинството Американци веруваат дека политичкото раководство на САД е премногу старо, при што 79 проценти од испитаниците се согласуваат дека „избраните функционери во Вашингтон се премногу стари за да го претставуваат мнозинството Американци“.
