Суперхерој и надвор од екранот: Кристијан Бејл отвори центар за згрижување деца

Актерот Кристијан Бејл отвори центар за згрижување деца наречен Together California во Палмдејл, Калифорнија.

Иако го остави костимот на Бетмен зад себе уште во 2012 година, славниот актер не престана да биде суперхерој и надвор од филмското платно.

Според извештаите на американските медиуми, комплексот се простира на површина од над 1.000 квадратни метри и официјално беше отворен во петокот. Целта на центарот е да им овозможи на браќата и сестрите заеднички да влезат во системот за згрижување – нешто што не им е секогаш загарантирано.

„Нашата задача е да ги претвориме нивните скршени срца и болка во љубов, надеж и чувство за иднината“, изјави Бејл.

Комплексот се состои од 12 опремени домови, вклучувајќи и две гарсониери наменети за млади луѓе кои преминуваат од системот за згрижување кон самостоен живот.

Со повеќе од 30.000 деца во системот, Лос Анџелес има најголема популација на деца во згрижувачки семејства во САД. Организаторите изјавија дека Together California ќе понуди програми фокусирани на стабилност, поддршка и грижа.

„Место каде што сите се добредојдени, место што ги одржува семејствата заедно, место што создава заедница, место каде што можете да најдете надеж во најтешките моменти“, изјави Тим Мекормик, извршен директор на Together California, во изјава за локален весник.

Бејл има две деца, Лука и Рекс Бејл, со сопругата Сиби Блажиќ. Одгледувањето на сопствените деца го поттикнало да размислува за околностите во кои растат децата без родители. Бејл и Мекормик ги здружија силите во 2022 година за да го започнат проектот и да ја основаат организацијата Together California. Проектот беше реализиран благодарение на донации. По свеченото сечење на лентата, организаторите најавија дека центарот треба да започне со работа веќе следниот месец.