Како Бирмингем се збогува со својот Ози Озборн?

Обожавателите на Ози Озборн се собраа во неговиот роден град Бирмингем вчера за да му оддадат последна почит на неодамна починатиот легендарен музичар и икона на хеви металот.

Фронтменот на „Блек Сабат“, кој одржа проштален концерт во англискиот град претходно овој месец, почина минатиот вторник на 76-годишна возраст. Обожавателите излегоа да му оддадат последна почит на Ози Озборн додека течеше погребната поворка низ неговиот роден Бирмингем.

Поворката со погребното возило и членовите на неговото семејство застана на мост и клупа посветени на легендарниот британски бенд, украсени со нивни портрети и потписи, каде што илјадници обожаватели се собраа за да положат цвеќе и да му оддадат почит. Поворката помина и покрај „Брод Стрит“, каде што се врежани ѕвезди со имињата на познати луѓе од градот, вклучувајќи го и познатиот музичар.

Еден обожавател со прекар Гас изјави за PA дека го открил хеви металот како тинејџер. „Тогаш сфатив, како и милиони други низ целиот свет, дека постои музика за нас, нешто што нè разбира.“

„Знаевме дека има некој што се чувствува исто“, продолжи Гас. „Ози му го даде тоа на светот. Тој беше член на семејството на толку многу луѓе низ целиот свет и допре до толку многу животи.“

Еви Мајо, од Вулверхемптон, рече дека ѕвездата на хеви метал била огромна инспирација за неа и другите жители на Бирмингем.

„Мислам дека беше многу влијателен, беше многу инспиративна личност“, рече таа. „Сега кога го нема, можете да го почувствувате неговото влијание“, заклучи таа.

Обожавателите оставија пораки за Озборн низ целиот град, вклучително и на муралот „Сабат“ на „Невигејшн стрит“.

Градоначалникот на Бирмингем, Зафар Икбал, рече дека „Ози не беше само музичка легенда“, туку и „син на Бирмингем“.

„Знаеме колку многу значи овој момент за неговите обожаватели. Горди сме што ги угостивме тука со неговото љубезно семејство, на местото каде што сè започна. Благодарни сме што тие великодушно понудија да платат за да го овозможат ова и да го поддржат градот во збогувањето што Ози го заслужува“, додаде тој.

Шерон Озборн беше видливо потресена за време на погребната поворка на нејзиниот сопруг, со кој беа заедно повеќе од 40 години.

Во придружба на нивните три деца - Кели, Ејми и Џек – таа одеше во погребната поворка за Ози низ Бирмингем.

Оставајќи цвеќе на едно од смомен местата во градот, таа ја поздрави насобраната толпа покажувајќи знак за мир со двете раце.