Сепаратистите од регионот Волта прогласија независност од Гана, на повидок е создавање на нова држава на африканскиот континент.
Во Западен Того живеат 4 милиони жители и тоа од различни националности и религии. Изминативе години тие се обединети откако кренаа раце од надежта дека ганските власти ќе инвестираат во развој на Волта, како што се вика регионот во склоп на Гана. Освен Волта, уште четири други региони се приклучени во новата држава.
Најголем град е Хо, со скоро 100.000 жители, и се очекува истиот да стане главен град.
Претходно имаше еден неуспешен обид за прогласување независност во мај, кога ганските полициски сили уапсија осумина лидери на сепаратистичкото движење.
Џорџ Њакпо, кој фигурира како министер за инфоирмации во самопрогласената влада, за локално радио изјави: „Ќе ги известиме Обединетите нации за нашата независност и ќе побараме признавање за што ќе ни биде потребна нивна поддршка“.
„Со години сме сведоци на тоа дека ние како регион Волта бевме постојано заборавани од владата и нејзиниот буџет. Може ли родител да си ги заборави сопствените деца? Очигледно ние не сме нивни деца, затоа и не забораваа“, додаде Њакпо.
Територијата на Западен Того порано била дел од германскиот протекторат Тоголенд од 1884 до 1914 кога британски и француски сили извршиле инвазија. Со Договорот од Версај, протекторатот бил поделен на британски и француски дел, а потоа во 1957 британскиот бил приклучен кон соседна Гана која тогаш станала независна држава. Францускиот дел три години подоцна станал независен Того.
