Пропаднал дел од познат плоштад во италијанската престолнина откривајќи стар римски пат од пред новата ера.
На плоштадот „Ла Ротонда“ кај Пантеонот уште на 27 април едноставно пропаднал дел од површината при што отворил поглед кон пат стар повеќе од 2 илјади години.
Работници веднаш биле пратени на терен за да го обезбедат пристапот. Бидејќи дупката длабока два метра давала поглед кон нешто што личело дека треба да се истражи, била проширена при што биле пронајдени 7 патни камења за кои се претпоставува дека датираат од 27-25 година пред новата ера и биле дел од римски пат. Горе-доле од истиот период кога е изграден Пантеонот.
За среќа во моментот кога површината пропаднала немало луѓе, па поради тоа нема ни повтредени. „Пјаца дела Ротонда“ е едно од најпосетените туристички места во италијанскиот главен град, но поради пандемијата со коронавирусот сега речиси и да нема луѓе, освен локалните жители кои само поминуваат.
Геологот Стефанија вели дека причината за колапсот на површината се подземните празнини.
„Најчувствителен дел е истокот на Рим каде било ископувано уште во античко време. Најчестата причина за ваквите дупки се постоењето на подземни празнини“, вели таа.
