Стоматолошките дупчалки брмчат, устата ви се полни со плунка и не можете да голтате. Многумина ги фаќа паника во вакви моменти, но има и такви кои генерално се плашат од лекарите и страдаат од иатрофобија.
Ако можете да се идентификувате со ова, сознанието дека времето од денот е клучно за количината на болка што ќе ја почувствувате може да помогне. Советото на стоматологот Јохан Х. Шмит до сите кои се двоумат дали да дојдат на преглед или подолга процедура гласи: дојдете попладне бидејќи тогаш пациентите чувствуваат помала болка предизвикана од инјекции и дупчење.
Имено, во овој период од денот мозокот произведува особено големи количини на ендорфини и опиоиди, кои ја намалуваат болката, тврди стоматологот од Келн. Тогаш анестетикот ќе делува малку подобро и, пред сè, малку подолго.
Според некои проценки, приближно 12 отсто од населението се плаши од лекари, а кај децата оваа бројка е и до 19 отсто. Сепак, има помалку пациенти со потешка иатрофобија.
Колку подолго иатрофобите ја одложуваат посетата на лекар, толку повеќе им се влошува состојбата, што е чест проблем, велат експертите. Затоа, медицинската процедура на крајот се покажува многу понепријатна кога конечно ќе отидат на лекар, што потоа само го потврдува и засилува нивниот страв - како во маѓепсан круг.
За среќа, иатрофобијата може да се излечи со когнитивно-бихејвиорална терапија. Пациентот и терапевтот го анализираат редоследот на настаните за време на медицинската операција, како на забавена снимка. Пациентот потоа постепено се изложува на предизвикувачите на неговите стравови.
Стоматолозите денес нудат можност за лекување на плашливи пациенти под општа анестезија или хипноза. Може да помогнат и техниките за релаксација или одвлекување на вниманието со музика или филмови. Исто така, важно е пациентите кои се соочуваат со операција да не го потиснуваат својот страв.