McLaren го изгради името произведувајќи атрактивни и скапи суперавтомобили, а пред официјалната премиера на новиот модел, Speedtail, реши да објави неколку фотографии од него.
Фотографиите го откриваат внатрешниот и надворешниот изглед на автомобилот, а на прв поглед изгледа дека овој модел нема никого да го остави рамнодушен.
Надворешниот изглед на автомобилот можеби ќе предизвика различни коментари, но мора да се признае дека McLaren успеа да го направи моделот Speedtail многу атрактивно возило кое со сигурност ќе ви го привлече вниманието кога поминува покрај вас. Оригиналниот, флуиден дизајн во голема мера е подреден на барањата на аеродинамиката.
Додека предниот дел од автомобилот има слични карактеристики како некои од моделите од новата генерација на McLaren, изгледот на кабината и продолжениот заден дел го прават овој модел специфичен.
Дизајнот на ентериерот со три седишта и централно позиционирано седиште за возачот е инспириран од легендарниот модел McLaren F1 од 1990-тите. Во кокпитот очекувано доминира командната табла со дури 5 екрани, од кои двата странични се задолжени за приказ на сликите од камерите кои ги менуваат ретровизорите.
Новиот модел на McLaren припаѓа на серијата возила Ultimate на британскиот производител, каде што се наоѓаат и тркачки ориентираните модели Senna и P1. Техничките детали засега не се најавени, но најавено е дека автомобилот ќе има хибриден погонски систем составен од twin-turbo V8 мотор, помогнат од електромотор.
Од McLaren беше најавено дека Speedtail ќе биде најбрзиот продукциски автомобил на компанијата, а се очекува дека максималната брзина ќе биде скоро 400 км/ч. Ова е сосем логично ако се земат предвид досегашните најави дека овој модел ќе има повеќе од 1.000 коњски сили.
Во план е ограничена серија од 106 примероци, а наводно сите произведени автомобили се однапред резервирани по цена од 1,75 милиони фунти. Производството на McLaren Speedtail ќе започне во 2019 година.