Свет

Се посрамија пред Путин: Руска подморница не успеа да истрела ракета на воена вежба

21. октомври 2019 - 16:57 | МИА/КАЈГАНА

Руска нуклеарна подморница се откажала од тестирање на интерконтинентална балистичка ракета, на воена вежба што се одржа минатата недела, а која ја следел и претседателот Владимир Путин, соопшти денеска руското Министерство за одбрана.

Нуклеарната подморница „К-44 Рјазан“, дел од руската пацифичка флота, пред четири дена требало да лансира две ракети „Р-29Р“ во Охотско Море, а успешно била лансирана само една, додека втората останала во цевката за лансирање на подморницата, пренесе весникот „Ведомости“.

Инцидентот се случил истиот ден кога Путин ја следел вежбата од Командниот центар во Министерството за одбрана во Москва.

Акцијата во Охотско море била дел од пошироките воени вежби на вооружените сили- „Гром 2019“, чија цел е тестирање на подготвеноста на силите за нуклеарен судир.

Министерството за одбрана денеска го потврди инцидентот со балистичката ракета, но го отфрли тврдењето на весникот дека неуспешното лансирање на втората ракета предизвикало „тревога“, пренесуваат руските медиуми.

Во воените вежби на рускиот Далечен Исток и Далечен Север од 15 до 17 октомври учествуваа повеќе од 12.000 војници, повеќе од 100 летала и пет подморници, соопшти министерството.

Вежбата се одвивала на подрачјата на Баренцово, Балтичко, Црно и Охотско Море, како и на Каспиското Езеро.

Коментирај