Болидот F300 на Ферари што легендарниот германски возач на Формула 1 го возеше во трка со ривалот Мика Хакинен во 1998 година, е понуден на продажба.
Формула 1 имаше неколку неверојатни епохи, а меѓу првите 5 секако беше онаа со V10 мотори кога седумкратниот светски шампион Михаел Шумахер возеше за Ферари. Реткост е Ф1 болид на Ферари со V10 мотор да излезе на продажба, особено оној што го возел Шумахер, но ентузијастите сега имаат фантастична можност да поседуваат дел од историјата и да го купат F300 од 1998 година за 4,9 милиони долари.
Станува збор за болидот со кој Шумахер го освои второто место на ГН на Луксембург во 1998 година. Навивачите ќе се сеќаваат дека тој беше во пол-позиција за таа трка, додека Мика Хакинен беше трет во болидот на Мекларен-Мерцедес. Сепак, победникот на неделната трка беше Финецот, со што обезбеди драматична борба за титулата на патеката Сузуки во Јапонија.
Шумахер го возеше истиот болид на Сузуки, повторно ја обезбеди пол-позицијата, но му пукна гумата поради остатоци на патеката, па Хакинен победи и стана светски шампион.
Нема детали за болидоѕ, но додека беше активен во трките, F300 беше придвижуван од 047D 3.0-литарски V10 мотор на Ferrari кој развиваше околу 800 КС. Тоа беше почеток на ерата на Ferrari V10, а Германецот тогаш беше апсолутно доминантен во првиот дел од 2000-тите. Тој освои пет светски титули со Ферари до 2004 година, потоа беше трет во 2005 година, а во 2006 година V10 беше повлечен и почна да се користи 2,4-литарскиот V8 мотор.