Двајца играчи на тимот на актуелниот НБА шампион Голден Стејт Вориорс, четирикратниот Ол-стар Дрејмонд Грин и Џордан Пул се судрија на тренинг, а по вербалниот, дошло и до физички конфликт, јавуваат американски извори.
Според ESPN, Грин замавнал кон Пул за време на тренингот и го удрил откако прво се расправале, а потоа почнале да туркаат. Пул, кој е познат по тоа дека ги провоцира соиграчите за време на тренинзите и игрите, од кавгата со својот соиграч излегол без повреда и ги одработил вежбите пред да ја напушти салата.
Се очекува Грин да биде казнет за стореното. Вориорс по инцидентот го прекинаа тренингот, а од Sports Illustrated наведуваат дека ова не е првпат овие двајца кошаркари да се расправаат. Разликата е во тоа што сега имало „силен удар“, како што пишува изворот.
Грин ја започна својата кариера во 2012/13 година. а досега настапуваше исклучиво за Вориорс со кои беше четирикратен шампион во НБА. Во 2017 година беше најдобар крадец и одбранбен играч на годината и член на третата најдобра петорка во лигата. Годината пред тоа беше вклучен во вториот најдобар НБА тим. Пул е на пат да влезе во својата четврта сезона, откако беше избран од Вориорс со 28-ми пик на драфтот во 2019 година. Минатата сезона тој имаше просек од 18,5 поени, 3,4 скока и четири асистенции по натпревар.
