Глобалниот долг ќе достигне рекордни 277 илјади милијарди долари до крајот на годината, како резултат на понатамошното трошење на владите и компаниите како одговор на пандемијата на вирусот корона.
Според Институтот за меѓународни финансии (ММФ), чии членови се повеќе од 400 банки и финансиски институции ширум светот, глобалниот долг се зголемил за 15 илјади милијарди долари до септември, на 272 илјади милијарди долари.
Речиси две третини од тоа зголемување се однесува главно на развиените пазарни земји.
„Постои значителна неизвесност за тоа како глобалната економија може да се раздолжи во иднина без поголеми негативни последици врз економската активност“, се вели во извештајот, предупредувајќи на „напад од должничкото цунами“.
Вкупниот долг на развиените земји, се вели во извештајот, скокна на 432 проценти од БДП во третиот квартал, што претставува зголемување за 50 проценти во однос на 2019 година.
ММФ додава дека вкупниот американски долг е на пат да достигне 80 илјади милијарди долари оваа година, во споредба со 71 илјада милијарди долари во 2019 година.
Што се однесува до еврозоната, долгот се зголеми за 1,5 илјади милијарди на 53 илјади милијарди долари. Сепак, тоа е помалку од рекордните 55 илјади милијарди долари во вториот квартал на 2014 година.
Учеството на долг во БДП на земјите во развој достигна скоро 250 проценти, пренесува РТ.
Либан, Кина, Малезија и Турција се соочуваат со најголемо зголемување на долгот во нефинансискиот сектор.