Поранешниот висок член на КОНИ ги разгоре надежите на италијанските навивачи велејќи дека шансите Италија да се најде во Катар се „многу поконкретни отколку што луѓето мислат“.
„Аѕурите“ не успеаја да се пласираат на завршницата во Катар откако загубија на домашен терен од Македонија во март. Но, нивните надежи оживеаја откако Чиле поднесе жалба до ФИФА обвинувајќи го Еквадор дека во јужноамериканските квалификации настапувал со играч кој е Колумбиец и кој има лажни податоци во своето еквадорско државјанство, вклучително и годината на раѓање (обвинението е дека е неколку години постар отколку што се претставува).
Франко Кименти, кој сега е претседател на Италијанската голф федерација, а порано беше висок член на КОНИ (Италијанскиот олимписки комитет), и кој важи за голем експерт кога станува збор за спортското право, смета дека Италија има големи шанси да добие втора шанса и да отпатува за Катар.
„Сѐ уште има шанса да ја видиме Италија на Светското првенство и е многу поконкретка отколку што луѓето мислат“, е неговата изјава која ја пренесува реномираната La Repubblica.
„Очигледно Еквадор користел играч кој не смеел да биде на терен и сега ќе платат за тоа. Доколку тоа се случи, друга земја ќе ги замени, а правилата на ФИФА велат дека репрезентацијата со највисок ФИФА рејтинг треба да биде повикана. Во моментов - тоа е Италија“, објаснува Кименти.
Минатата недела ФИФА потврди дека започнала истрага околу пријавата на Чиле дека Еквадор ги фалсификувал документите на фудбалерот Бајрон Кастиљо.
Иако Италијанците се оптимисти, прашање е колку навистина ФИФА ќе го реши овој проблем во нивна полза. Чиле го пријави Еквадор не за Италија да игра во Катар, туку за таму да се најде Чиле. На страна тоа што Италијанците правилата си ги толкуваат како што ним им одговара.
Имено, постојат два начина на кои ФИФА може да го реши овој случај:
1) да му ги одземе на Еквадор освоените бодови од натпреварите на кои настапил со контроверзниот Кастиљо, а со тоа на конечната табела во Јужна Америка на место кое води во Катар ќе се најде Чиле;
2) едноставно да го дисквалификува Еквадор без да прави промени во квалификациската табела, а на негово место да повика друга репрезентација и тоа:
– 2а) бидејќи секоја зона има определен број на места на завршницата, за да се задржи рамноправноста ФИФА може да одбере да го замени Еквадор со најдобро рангираната јужноамериканска репрезентација, а при такво сценарио ќе се офајди Колумбија;
– 2б) ФИФА да одлучи на Мундијалот да се квалификува најдобро рангираната репрезентација од нејзината ранг-листа, а да е од било која зона, случај во кој Италија, која е на 6. место и единствена од топ 10 која не избори пласман, би се израдувала.
За било кое од овие сценарија да се оствари прво треба да почекаме ФИФА да потврди дека Кастиљо навистина имал фалсификувани документи и Еквадор да биде казнет. Дотогаш - сите можат само да се надеваат. Италија веќе се разочара од една одлука на ФИФА откако гаеја надежи дека Иран ќе биде исфрлен поради забраната за жени за присуство на стадионите, но ФИФА тоа експресно го реши без исфрлање на Иран.
Од друга страна, зошто Италија да добие гратис место кога нашата Македонија ја исфрли уште во 1. коло од баражите и отидовме подалеку во квалификациите од нив?