ФИФА и УЕФА нѐ враќаат назад во времето преку нивните видео канали каде секој ден се репризира по некој незаборавен натпревар од Мундијалите или ЕУРО.
Викендов има богата понуда на програмата на ФИФА и УЕФА. Светската куќа на фудбалот преку својот YouTube канал најпрво нѐ носи на „Деле Алпи“ во Торино каде на 24 јуни 1990 година во осминафиналето од Мундијалот во Италија копјата ги вкрстија великаните Бразил и Аргентина. Тафарел, Дунга, Мулер, Карека од една страна против Гојкочеа, Руџери, Буручага, Каниџа и Марадона од друга. Одлична шанса за постарите да се потсетат, а помладите да видат што пропуштиле.
УЕФА денеска не носи во Лисабон, поточно на 13 јуни 2004 година. На стадионот „Да Луж“ во рамките на групата Б судир на вечните ривали Франција и Англија. Французите со Бартез, Лизаразу, Тјурам, Виера, Пирес, Зидан, Анри, Трезеге, Англичаните со Невил, Кембел, Бекам, Џерард, Лампард, Овен, Руни.
Линк за гледање тука.
Во текот на утрешниот ден на програмата се два натпревара од поновата историја. ФИФА се реши да нѐ потсети на мајсториите на Кристијано Роналдо кога сам ја носеше Португалија на мегдан со соседот Шпанија во групата Б во еден неверојатно богат со голови натпревар. Стадион „Фишт“ во Сочи, Русија, 15 јуни 2018 година.
УЕФА утре нѐ враќа на последното ЕУРО 2016 на „Парк Олимпик Лионе“ во Лион каде на 22 јуни во групата Ф се сретнаа Унгарија и Португалија и одиграа чудесен натпревар за мерак на публиката.
Линк за гледање тука.
Денеска:
17 часот: Франција - Англија (ЕУРО 2004)
18 часот: Бразил - Аргентина (Светско 1990)
Утре:
17 часот: Унгарија - Португалија (ЕУРО 2016)
18 часот: Португалија - Шпанија (Светско 2018)