Македонскиот фудбалски првак Шкупи утре ќе го игра реваншот од третото квалификациско коло за Лига Европа. Противникот на чаирчани, Шамрок од Ирска на првиот натпревар пред четири дена победи со 3:1.
Тренерот на Шкупи, Гоце Седлоски, верува дека неговите избраници можат да ја анулираат предноста на Шамрок.
– Одиме на победа со два гола разлика. Немаме друг избор. Мора да дадеме максимум во текот на целиот натпревар. Уште од самиот почеток треба да тргнеме агресивно. Грешките да ги сведеме на минимум. Видовме и во Ирска, и на претходните средби како се казнуваат грешките во евро-куповите. Верувам во мојот тим, но се надевам дека со помош на нашите навивачи можеме да ја анулираме негативата од два гола од првиот натпревар, изјави Седлоски на денешната официјална прес-конференција.
Натпреварот Шкупи - Шамрок е закажан за утревечер од 21 часот на Национална Арена „Тодор Проески“ во Скопје.
Билетите по цена од 150 денари се во продажба во подажните места на Литература МК во Ист Гејт и Рамстор Мол, можат да се набават и на билетарата на стадионот „Чаир“ и на Арената „Тодор Проески“, како и на Бит Пазар, додека онлајн можат да се купат на MKTickets.