Претседателот на ФФМ денеска рече дека сѐ уште нема преговори со селекторот Игор Ангеловски за продолжување на договорот.
Муамед Сејдини денеска како гостин во емисијата „Магазин“ на Сител ТВ беше прашан и за тоа кој ќе ја води македонската репрезентација на ЕУРО 2020 со оглед на тоа што договорот на селекторот Игор Ангеловски, кој нѐ однесе на ова за нас историско Европско првенство, истекува на 31 месецов.
„Договорот на Ангеловски истекува на 31.12.2020. Пракса е да се разговара за продолжување откако ќе истече актуелниот договор. Така да со него ќе разговараме после Нова година“, изјави тој.
Претходно и селекторот Ангеловски во интервју за MacedonianFootball.com потврди дека преговори со ФФМ нема, ниту пак бил контактиран од нивна страна.
„Мојот сон е остварен: Македонија ќе игра на ЕУРО 2020 во јуни. Нашите навивачи ќе го веат македонското знаме и сите заедно ќе ја пееме македонската химна. Сѐ уште ме нема контактирано ФФМ и преговорите не започнале. Мојот договор истекува на 31.12.2020“.
