Претседателот на Фудбалската федерација на Македонија вели дека донеле одлука приоритет при набавката на билети за ЕУРО 2020 да добијат вработените во медицинскиот сектор во државава кои ќе сакаат во живо да ја бодрат репрезентацијата на Македонија.
„Иако во моментот сѐ уште нема конечна одлука од УЕФА за бројот на влезниците за натпреварите од ЕУРО 2020 бидејќи здравствената ситуација може да наложи и да нема присуство на гледачи на стадионите (најнепосакувано сценарио за сите нас), сепак има надеж дека публика ќе има и секоја федерација ќе добие дел од влезниците за натпреварите на Европското првенство“, почнува Муамед Сејдини.
„Затоа, одлучивме како награда, доколку ситуацијата со пандемијата биде под контрола, како резултат на натчовечките напори и заложби кои секојдневно ги прават за заштита на нашето здравје во изминатиот период, а очигледно и во периодот што следува, приоритет за добивање на билети за следење на настапите на македонската репрезентација на Европското првенство да имаат сите медицински лица кои се во првите редови во борбата против COVID-19 (доктори, сестри, технички персонал)“.
Оваа одлука беше официјално усвоена денеска на седница на Управниот одбор на федерацијата.
„Јасно ми е дека ова е премалку, но чуствувам потреба на медицинскиот персонал на скромен начин да им се оддолжиме за пожртвуваноста и повеќемесечниот труд што го вложуваат за да нѐ заштитат сите нас. Да им ја искажеме нашата почит за нивната работа и да покажеме дека сме општество што цени вистински вредности“
„Најсреќен би бил кога во јуни 2021 година нашите медицински лица би ги замениле маските и заштитната униформа со навивачки реквизити, кога трагите од нив и уморот на нивните лица ќе ги заменат со насмевки за головите што нашите ќе ги постигнат на Европското првенство“, заврши претседателот на ФФМ.
ЕУРО 2020 ќе се игра од 11 јуни до 11 јули 2021 година, а Македонија своите натпревари ги има на 6 јуни против Австрија во Букурешт, четири дена подоцна во истиот град против Романија, а потоа на 21 јуни против Холандија во Амстердам.
