Стручното списание The Lancet Psychiatry објави резултати од истражување во САД, а во кое се наведува дека кај пациентите со COVID-19 најчестите појави по прележување на болеста се анксиозност и депресија.
На научниците сè уште не им е јасно како овие нарушувања се поврзани со вирусот.
Истражувањето, спроведено врз повеќе од 230.000 испитаници, главно во САД, открива дека кај еден од тројца преживеани пациенти со COVID-19 шест месеци по третманот има дијагностицирано невролошко или психијатриско нарушување.
Овој наод упатува на заклучокот дека може да се очекува бран од невролошки и психијатриски пациенти како последица на пандемијата, наведува списанието.
Британските медиуми наведуваат дека анксиозноста и депресијата се најчести појави кај преживеаните пациенти со COVID-19, иако на научниците не им е јасно како овие нарушувања се поврзани со вирусот.
Истражувањето не утврдило кои биолошки или психолошки механизми се предизвикувачи на овие нарушувања, но заклучува дека е потребно да се иницира ново истражување за да се утврди што ги предизвикува овие состојби, како да ги спречи или како медицински да се третираат.
Врз основа на анализата на медицинските досиеја на повеќе од 236.000 лица кај 34 отсто од пациентите, по шест месеци од прележувањето на COVID-19, дијагностицирани се невролошки или психијатриски проблеми.