Живот

Секретарка во музеј украла цртеж на Густав Климт и го чувала до смртта

13. февруари 2018 - 19:45 | А.С.

Цртеж на австрискиот сликар Густав Климт што беше исчезнат од музејската збирка, бил најден меѓу оставнината на секретарка во музејот која неодамна починала, соопштија денеска службите.

Цртежот „Zwei Liegende“ е едно од четирите дела на Климт и неговиот современик на виенскиот модернизам Егон Шиле, што беа предмет на долгата правна битка меѓу градот Линц и наследниците на уметницата и колекционерка на уметнички дела Олга Јегер.

Јегер ги имаше дадено делата на долгорочен заем на музејот во Линц во 1951 година.

Кога нејзините наследници ги побарале делата назад во 2006 година, никој не можел да ги најде во архивот.

Наследниците го тужеа градот и по долга правна битка добија отштета од 8,21 милиони евра.

Сега, градските власти велат дека успеале да го најдат цртежот на Климт.

Секретарка која работела во музејот го зела и со години го криела во креденец, а пред да почине оставила инструкции како да биде вратен на градот по нејзината смрт.

Од следниот месец до мај цртежот ќе биде изложен во една од десетиците изложби ширум Австрија поставени во чест на 100-годишнината од смртта на Климт и Шиле.

Потоа цртежот ќе им биде вратен на наследниците на Јегер, ако ја вратат отштетата што ја добиле за делото.

Коментирај