Џан Пјеро Вентура не сака да си поднесе оставка од местото селектор на Италија додека не бидат исполнети одредени услови.
После Антонио Конте, фудбалскиот сојуз се коцкаше со Вентура, кој е искусен италијански експерт, но без некакви посебни резултати во кариерата.
На крај тоа ги чинеше Италијаните вистинска катастрофа, неиграње на Мундијалот во Русија 2018 година.
70 – годишниот Џан Пјеро Вентура поради неуспехот со „Азурите“ кои после цели 60 години ќе пропуштат Светско првенство, стана најомразена личност во Италија, а и покрај тоа што се очекуваше „морален чин“ и негова оставка поради неисполнетите очекување, тоа се уште се нема случено.
Вентура не се огласи по тоа прашање.
Неговиот договор со Италија важи уште две години и во случај на отказ му следуваат 2.6 милиони евра отштета која не би ја добил ако сам си поднесе оставка, а медиумите шпекулираат дека е на чекор од компромис со државниот тим.
Џан Пјеро Вентура наводно е подготвен да поднесе оставка доколку му понудат 700.000 евра, а оставки се очекува да поднесат и главните луѓе во Сојузот.
Италија доживеа пораз во баражот за пласман на Мундијалот од Шведска со вкупен резултат од 1:0, што предизвика голема бура на незадоволство во земјата која е навикната да биде дел од големи натпреварувања и која го освојуваше Светското првенство четири пати.