Селена Гомес се насочи кон зајакнување на своето ментално здравје откако минатата година ѝ беше дијагностицирано биполарно растројство.
Популарната пејачка во интервју за Vogue Australia открива како во борбата против биполарното пореметување ѝ помага ДБТ - дијалектичко-бихевиорална терапија.
„Можете да најдете начин да живеете со него. Откако ќе го разберете тоа, исчезнува стравот да им признаете на луѓето дека имате дијагноза“, рече таа.
Исто така изјави дека откако отишла на терапија, забележала значително подобрување во своето ментално здравје, но и во начинот на размислување.
„Навистина сум задоволна од тоа што сум. Благодарна сум што зачекорив во мојата 29-та година, бидејќи бев сосема поинаква пред само две години. Сега сум подобра“, рече таа.
ДБТ спаѓа во групата на когнитивна бихевиорална терапија. Оваа терапија користи директивен пристап и методи на проучување на вештините потребни за подобар квалитет на живот. Се користи кај луѓе кои имаат проблеми со контрола на импулсот, самоуништувачко однесување, промени во расположението, меѓучовечки проблеми и нарушувања во исхраната.
Оваа терапија им помага на пациентите да ги препознаат и променат негативните обрасци на размислување и помага да развијат позитивни промени во однесувањето на една личност. Овој тип на терапија се смета за најдобра во третманот на гранично нарушување на личноста, но исто така се користи во третманот на биполарно растројство, како и ПТСН.
