Популарната пејачка Селена Гомез откри дека направила трансплантација на бубрег во текот на летото, како дел од борбата против болеста Лупус. Донатор била нејзината најдобра другарка Франсија Раиса.
Во постот што го објави на Instagram, Селена ѝ се заблагодари за големата жртва.
„Неверојатно сум благословена. Многу те сакам.“
Таа ја сподели фотографијата на која заедно со другарка ѝ лежат во болнички кревети една до друга и се држат за раце, како и фотографија на која ги покажа лузните од операцијата.
„Свесна сум дека моите обожаватели забележаа дека ме немаше летово и ме прашуваа зошто не ги промовирам новите песни со кои многу се гордеам. Дознав дека ми е потребна трансплантација на бубрегот поради болеста Лупус што ја имам и сега закрепнувам. Морав да го направам тоа за моето здравје. Се радувам што сега можам да го споделам со вас моето патување од изминативе неколку месеци. Јавно им се заблагодарувам на моето семејство, на прекрасните лекари за сѐ што направија за мене и на крај, не можам да ви опишам колку ѝ сум благодарна на мојата прекрасна другарка Франсија Раиса“, напиша, меѓу другото, Селена.
Раиса има 29 години, таа е актерка и модел од Лос Анџелес и ќерка на познатиот радиоводител Ренан Коелјо. Двете се дружат од 2008 година и станале многу блиски другарки.
