Популарната пејачка Селин Дион им се обрати на фановите преку Instagram и откри дека боледува од ретко невролошко нарушување.
„Поздрав до сите. Извинете што ми требаше толку време да се вратам кај вас. Многу ми недостигате сите и едвај чекам да разговарам со вас на сцена“, рече таа.
Дион со растреперен глас рече дека конечно е подготвена на сите да им каже што се случува со нејзиното здравје.
„Како што знаете, отсекогаш бев како отворена книга и не бев подготвена да ви кажам порано, но сега сум. Имав здравствени проблеми долго време и ми беше навистина тешко да се соочам со предизвиците и да зборувам за сето она низ кое поминував“.
Таа откри дека од болеста што ја има страда еден на милион луѓе и дека поради лекувањето ќе мора да ги одложи концертите закажани за 2023 година и дека се надева дека ќе настапи дури во 2024 година.
„Неодамна ми беше дијагностицирана ретка невролошка болест наречена ‘Синдром на вкочанет човек’, која погодува еден во милион луѓе. Иако сè уште учиме за оваа ретка болест, сега знаеме што ги предизвикувало грчевите што ги имав“, рече Дион.
Имајќи предвид дека болеста е ретка, многумина не знаат за што точно се работи. Се карактеризира со мускулна вкочанетост на трупот и екстремитетите, како и зголемена чувствителност на бучава, стрес и допир, кои предизвикуваат грчеви во мускулите.